(نغمه)
ایشیقلی اۆمیدلر
دومانا دؤندو،
سویوق قؽش نفسلی یاز اولدو بو گۆن.
گؤروش گؤزلهییردیم، هیجرانا دؤندو،
منیم طالعیمدن پوزولدو بو گۆن.
عؤمرومون اینتیظار
صحیفهسینه
دئدیم: بلکه نورلا یازیلدی بو گۆن!
یاد تک قولاق آسدیم سنین سسینه،
منیم طالعیمدن پوزولدو بو گۆن!
بو گۆنو نئجه ده
من گؤزلهییردیم،
سئوینجیمین عؤمرو آز اولدو بو گۆن،
بو گۆنه تانریدان بخشیش دئییردیم،
نیه طالعیمدن پوزولدو بو گۆن؟
وۆصال ایشیغینا
من یول گئدرکن،
بیر آرزو حسرته یوزولدو بو گۆن.
اۆرگینده منم، اۆرگیمده سن،
نئچین طالعیمدن پوزولدو بو گۆن؟
7 آپرئل ۲۰۰۱