سنی گؤرن گۆندن
دییشدی دۆنیام،
نورومو نورونا
قاتا بیلمیرم.
سن پارلاق گۆنشسن،
من سولغون آیام،
ایزینجه گلیرم،
چاتا بیلمیرم.
شفقلر کاینات
سینهسیندهدیر
ایشیغین مندهدیر،
قلبیم سندهدیر!
ائله بیل چؽخمیشام
عؤمرون قؽشیندان،
یوخسا یاز قانادلی
قارانقوشام من؟
ائله بیل دۆنیانین
یارانیشیندان،
سنه حسرت اۆچون
دوغولموشام من!
ایستی شفقلرله
گؤزلر گۆلنده،
طبیعت قوینوندا
نور اونودولور.
آخی آی گۆنشه
یاخین گلنده
گۆنش ده دئییرلر
او گۆن توتولور.
سنه یاناشسام دا
من آرام-آرام،
سنی نور یولوندان
نئجه ساخلارام؟
اۆرکده قالاجاق آرزو دا، کام دا؟
آیام، یوخسا سؤنموش
بیر چؽراغاممی؟
سنی آددیم-آددیم
من آراسام دا
هاچانسا من سنه
چاتاجاقاممی؟
11 آپرئل ۱۹۹۹