نیه گئجیکدینیز، دورنالار، نیه؟

سما یولچولاری،
   حسرت گؤزلرم،
بو قدر گئجیکمک اولماز، دورنالار!
سیزی اۆفوقلرده گزر گؤزلریم،
نیه گلمزسینیز بو یاز، دورنالار!

هر ایل سمالاردا سؽرالاندیقجا،
گلدی قانادینیز اۆستونده باهار.
سونسوز ماویلیکده میصراعلاندیقجا،
بیر شعر سسلندی سؤزونده - باهار.

زیللنیب گؤیلره
   بۆللور گؤز کیمی،
سیزی دورنا گؤزلو گؤللر گؤزله‌ییر.
هر ایل الهیدن دۆشن ایز کیمی،
تئللر سالدیغینیز چؤللر گؤزله‌ییر.

گلین، دورنالاریم،
   تاریخ ایزییله،
دۆنندن بوگونکو عصره‌دک، گلین!
فۆضولی آرزوسو، واقیف سؤزویله،
یوللانیب باغداددان، بصره‌دن، گلین!

زامانین زهری
   چؤکسه ده یئره،
آغ سما چایی تک آخین، دورنالار!
بلکه دؤزمک اولدو چیرکلی گؤللره،
قارا اۆرکلردن قورخون، دورنالار!

قاراباغ گؤزلردی گلیشینیزی،
هر ایل یول چکردی داغلارین گؤزو.
بو گۆن یانان ائولر، —
باریت قوخوسو،
ناگاهان آچیلان
گۆلله قورخوسو
بلکه پرن-پرن ائیله‌ییب سیزی؟

اؤلوم گزن یئرده،
   گزرمی دورنا؟
قان سؽزان سولاردا،
   اۆزرمی دورنا؟
بیردن سس ائشیتدیم...
اونا های وئردیم.
دئیین، بیلدینیزمی، گؤزوم یولدادیر؟
بو گۆن دورنالاری یوخودا گؤردوم،

اوچور دورنالاریم گؤردوم، یولدادیر
اینسانلار! دایانین!
   سیز مغرور، اوجا،
باشینیز اۆستوندن دورنالار گلیر،
اونلار قیطعه-قیطعه قاناد چالدیقجا،
گؤروشه اؤلکه‌لر، دۆنیالار گلیر!

گؤیلری آینا تک
   سیلیر دورنالار،
نئجه بۆللورلاشیر سونسوز بیر عالم.
شاهانه لنگرله گلیر دورنالار،
هارا قوناجاقدیر دئیه بیلمرم.

۱۹۹۳