باخدیم گؤزلر غملی،
باخیشلار اۆرکک،
من سوسدوم، قورودو دیلیم ده سانکی.
بیر الدن توتدوم کی،
آتشلی، تیترک،
رئیحان توپاسییدی الیمده سانکی،
بیردن اولدوزلار دا
یئره ائندیلر،
شیمشکلر های وئردی اۆرک آهیما.
سانکی شفقلر ده عطیرلندیلر،
رئیحان راییحهسی آخدی روحوما.
سؤزلر چمنلردن
اسن یئل کیمی،
تانری، سؤزلرین ده عطری اولارمیش!
گؤزلر لالهدهکی قارا خال کیمی،
تانری، گؤزلرین ده عطری اولارمیش!
ظۆلمتلی یوللاردان
کئچیردیم دۆنن،
بو گۆنسه پارلادی ضیا منیمچین.
اؤزوم ده بیلمیرم نه اۆچون، نهدن،
رئیحان عطیرلیدیر دۆنیا منیمچین.
کؤنولده اویانان
بو دویغو نیدی؟
یاپیش اللریمدن ائی سیرلی اللر!
بلکه ایلاهیدن بیر مؤعجوزهیدی،
عطیرلی دۆنیامدا عطیرلی اللر؟
کۆلکدیر،
چیچکلر لئیسان قوپاریر،
گؤرن آختاریرام من کیمی، نهیی؟
منی، من بیلمیرم هارا آپاریر
حئیران اۆرگیمین رئیحان ایستگی؟
بو منه جاهاندا
سیرّ کیمی قالیر،
سن کیمین آرزوسو، محبّتیسن؟
بلکه حقیقتین
سن ایلک خیالی،
خیالین سونونجو حقیقتیسن؟
۲۸-۳۱ دئکابر ۱۹۹۷