منو
اون یئددی یاشین نغمه‌سی
(آرزونون اؤز آناسی‌یلا خیالی صؤحبتی)
— دنیز اولماق
ایسته‌ییرم
آی آنا،
اؤز سینه‌می گؤیلر اۆچون آچارام.
— یوخ، آی بالا،
آنان قوربان بویونا،
دنیز اولسان، نئجه سنی قوجارام؟
— زیروه اولماق
ایسته‌ییرم،
آی آنا،
اوجالاردان هر آن سنی آرارام.
— یوخ، آی بالا،
آنان قوربان بویونا!
نئجه اوندا ساچلارینی دارارام؟
— گۆنش اولماق
ایسته‌ییرم،
آی آنا،
ایشیق آلسین مندن تورپاق، آسیمان..،
— یوخ، آی بالا،
آنان قوربان بویونا!
ایشیق وئریب سن اؤزون ده یانارسان!
— بولاق اولماق
ایسته‌ییرم،
آی آنا،
داغدان آخیم باغچایا من، باغا من...
— یوخ، آی بالا،
آنان قوربان بویونا!
اؤزون داغسان،
سؽغارمیسان
داغا سن؟
— نغمه اولماق
ایسته‌ییرم،
آی آنا،
من سسلنیم، باتما درده، غمه سن!
— اول، آی بالا،
آنان قوربان بویونا!
سن اونسوز دا
منه سونسوز نغمه‌سن.
۱۹۷۹