میصراعلار اۆستونده دۆشوندوم بعضاً،
قلبین دئدیگینه قولاق دا آسدیم.
ان گؤزل شعریمی یازماسام دا من،
ساندیم کی، سونونجو شعریمی یازدیم.
ائله بوشالدی کی، سینهمده اۆرک.
دئدیم، بیر ده یقین یازمایاجاغام.
ایلهام گلمهیجک یئنه قوناقتک،
بلکه ده سارالمیش، سولموش بیر داغام.
گۆنلر هیجانلا اؤتوشدو بیر-بیر،
یاتمادیم بعضاً ده سحره قدر.
یاشاییر سونونجو شعرله شاعیر،
باشقا بیر سونونجو اثره قدر.
یئنه دیله گلیر اۆرک تئللری،
قوش کیمی اوچماغا حاضیرام یئنه.
ائله یازیرام کی، سونونجو شعری،
سانکی ایلک شعریمی یازیرام یئنه.
۱۹۵۹