قورخولو بولودلار، یاخود تنهالیق ناغیلی
آخشامین تونج اۆزو –
هئیکل سۆکوتو،
گؤیلرده پارچا-پارچا
قورخو بولودو،
ایچیمدهکی حسرتدن،
اۆشندیگیم تکلیکدن ده
قارادیر،
عیسی کیمی
چارمیخا چکیلن بولودلاری
دۆشورن اولاجاقمی؟
ملک قانادلی یالانلار
فؽرلانیر هندورینده،
آچسام پنجرهنی
اوتاغیما دولاجاقمی؟...
توپا-توپا قارانلیق
فؽرلانیر گؤی اۆزونده،
سؽندیریلمیش بیر شیمشک
گیزلنیبدی گؤزونده.
طیّاره قانادلارینین
کؤلگهلری گؤرونور،
بولودلاردا قورغوشون سۆرونور؛
قورغوشون یاغموروندان
قورونا بیلهجکمی آداملار؟
آج قالان آتوملار
بولودلاردان ساللانیر.
اؤلوم قورخوسو چوخالدیقجا
حیات باللانیر...
بو باهار
قؽریلدی بال آریلاری،
چیچکلر یئتیم قالدی.
دۆنیا یئتیم قالاجاق
اینسانلار اولمایاندا.
قویمایین دولسون بولودلار،
بوشالماغا نهیی اولاجاق
دولمایاندا.
قزِتلردن یۆیورور اۆستومه
قارانفس خبرلر.
قاچقینلارین نالهسی،
اوشاقلارین هؽچقیریق سسی،
قونشولارین
هدهسی...
قالخیرام بارماقلاریمین اوجونا، -
بولودو توتام بلکه،
جؽریب آتام گؤیلرین
بو گئجه کؤینگینی،
اولدوزلارین گۆموشو ایشیغیندان اؤپم،
دۆنیایا اولدوز ایشیغی سپم...
چیچکلهیه سرحد دیرکلری،
تیکانلی بیر گۆل اولا.
دریب بو چیچکلری
دۆزَلم یولا.
دۆزم حسرتیمین
تورپاغینا، داشینا؛
بیر چیچک ده آپارام
تبریزه، -
آذربایجان مکتبینین آچیلیشینا...