گئجهنی فیکیرله سَحرلهیرلر
اینامی یولوندا اووود آداملار.
وَرَمله،
اینفارکتلا زهرلهیرلر
اۆرکلی کسلری روبوت آداملار.
اۆرک دؤیونهجک...
سؽخیلاندا دا
او، یئنی بیر حیات نفسی تاپیر.
فیکیرلی آداملار یؽخیلاندا دا
تورپاقدا جاذیبه قۆّهسی تاپیر.
دویغولو باشلاردا فیکیر داشینار؛
یاغیش یاغاجاقسا شیمشکلر چاخار.
سرخوش سۆروجولر،
ناساز ماشینلار
فیکیرلی آداملار اووونا چؽخار...
داغلارین اۆرگی سؤزله دولاندا
زیروهلر گؤرونمور، بۆرونور چنه؛
نهدنسه، گۆن باتیب، آخشام اولاندا
بو دۆنیا فؽکیرلی گؤرونور منه.
کئچیر بئیینلرین قارانلیغیندان
فیکیرلر مۆقدّس بیر ضیا کیمی.
فیکیرسیز، قایغیسیز، دویغوسوز اینسان
یاشاییر دۆنیادا بیر رؤیا کیمی...
هامار اولماییبدیر فیکرین مئیدانی،
زامان باشقا جۆره گؤروب علاجی.
فیکری عصرلری قاباقلایانی
یا تونقال گؤزلهییب،
یا دار آغاجی.
سؽسقا بولاغینا عۆمّان دئینلر
چکیر فؽراوانلیق، شاهلیق فیکرینی.
بیلمیر کی، جؽغیردا ایمکلهینلر
یؽخیلیر ناشی بیر کندیرباز کیمی.
آخیب،
آخا-آخا دورولوب سولار.
اتکلر سئللرین،
زیروه قاریندیر.
بو گۆنو فیکیرله یارادیبدیلار،
صاباح دا
فیکیرلی آداملاریندیر...