آغاجین آلتیندا کؤلگه،
کؤلگهنین آلتیندا تورپاق،
تورپاغین آلتیندا اؤلولریمیز.
آغاج اؤلنده
کؤلگهسینی آپاراجاق،
کؤلگه اؤلنده گۆنشی،
گۆنش اؤلنده
اؤلولره قوشولاجاغیق بیز...
بولودون اۆستونده آی،
دنیزین اۆستونده آی ایشیغی،
آی ایشیغیندا
اولو بیر سویوق.
آیی بولود اوداجاق،
آی ایشیغینی دنیز.
گئجهیه قوووشاجاغیق بیز.
کؤکسوموزون آلتیندا اۆرک،
اۆرگیمیزین آلتیندا آرزو،
آرزوموزون آلتیندا بیز.
اوّل بیز سوساجاغیق،
سونرا قلبیمیز.
آرزوموز یاشایاجاق،
آغاج بیتیرهجک
گۆنشین آلتیندا،
کؤلگه سرهجک
یارپاغین آلتیندا.
چکیب تورپاغی اۆستوموزه
گۆلهجگیک تورپاغین آلتیندا...