دلی بیر آغلاماق کئچیر کؤنلوم‌دن...

یۆیوروب، یۆیوروب دره بویونجا
دۆشوم چمن اۆسته قوی اۆزوقوی‌لو
اؤپوم بو تورپاغی،
اؤپوم دویونجا؛
اۆزومه اۆز قویسون بو سویوق داشی،
قوی شئهه قاریش‌سین گؤزومون یاشی...
قوروموش بولاقلار ایچیر کؤنلوم‌دن،
دلی بیر آغلاماق کئچیر کؤنلوم‌دن.

کؤنلونه دیدییم،
اینجیتدییم قؽز،
وۆقار کؤلگه‌سین‌ده یاتدیغیم بس‌دیر،
اودلو یاناغین‌دان سو ایچدییم قؽز،
بو قدر گۆناها باتدیغیم بس‌دیر.
داها دوداقلارین تیترمه‌سین قوی،
من سنین قارشین‌دا تیترییم، اسیم،
سن‌دن دۆنیالاری ایسته‌میرم، یوخ،
منی باغیشلاسان، بسیم‌دیر، بسیم.
یان دئسن،
آلیشیب یانا بیلرم.
دون دئسن،
یئریم‌ده دونا بیلرم!
ایندی بیلمیشم کی، عؤمور-گۆن گئدیر،
ان گؤزل حسّلریم کئچیر کؤنلوم‌دن،
قاییت!
سن عؤمرومه تزه‌لیک گتیر؛
دلی بیر آغلاماق کئچیر کؤنلوم‌دن.

چوخ‌دان قبریستانا دۆشمییر یولوم،
او تنها مزاری اوت باسیب بلکه.
منیم سویوقلوغوم لاقئیدلییم
اونون سینه‌سینه اود باسیب بلکه.
بیر داش وار گؤزومون یاشینا حسرت،
دایانیب او گیلئی هیکلی کیمی.
الیم تورپاغینا، داشینا حسرت،
یؽخیلیب اۆستونه من دلی کیمی
آغلایام گرک.
او تنها مزاری تورپاق‌دان اۆزوب
اووجومون ایچین‌ده ساخلایام گرک.
شؤهرتین اۆستونه یۆرودوکجه من
ایستکلر، آرزولار کؤچور کؤنلوم‌دن.
سئوگی دومانینا بۆروندوکجه من
دلی بیر آغلاماق کئچیر کؤنلوم‌دن.

کۆلکلر اویناییر کند ائویمیزده،
طالع باش گؤتوروب آپاریر منی.
هؤرومچک تور قوروب پنجره‌میزده،
حسرتیم چؽرپینیر او توردا منیم.
یاراسا بوی‌لانیر اوچوق تاوان‌دان،
بۆکولموش دیرکلر چات-چات اولوب‌دور.
قورخودان دیوارین باغری یاریلیب
قاپیلار چوخالیب دؤردقات اولوب‌دور.
گئدیم دیوارینا یالواریم اونون،
گئدیم قاپیلارین قاتی آچیل‌سین.
گئدیم من سونونجو دیریی اولوم
تاوانلار چینیمه باری اوچولسون...
داشی داش اۆستونه قویوم تزه‌دن.
دلیسوو کۆلکلر اسیر کؤنلوم‌ده!
ائله کؤورلمیشم،
بیلمیرم ندن
دلی بیر آغلاماق کئچیر کؤنلومدم.