گئتمک ایستییرسن ...

گئتمک ایستییرسن،
بهانه‌سیز گئت،
اویاتما مۆرگولو خاطره‌لری.
سسین همین سس‌دیر،
باخیشین اؤگئی،
گئدیرسن
سسین ده یاد اولسون، باری.

سن دنیز قوینونا توللانمیش چیچک،
اۆستونه دالغالار آتیلاجاق‌دیر.
ساختا محبّتین
ساختا سند تک
نه واخت‌سا اۆستون‌ده توتولاجاق‌دیر.

دؤشنیب یوللار تک آیاقلارینا،
سنه یالواریم‌می؟
بو مۆمکون دئییل.
قویمارام قلبیم تک وۆقاریم سؽنا،
آلچالیب یاشاماق عؤمور-گۆن دئییل.

دئمیرم، سن اوجا بیر داغسان، اییل
دئمیرم، علاجیم قالیب‌دیر سنه.
نه سن‌ده محبّت قارا پول دئییل،
نه من دیلنچیم، ال آچیم سنه.

گئتمک ایستییرسن،
او یول، او دا سن،
بیر جۆت گؤز باخاجاق آرخانجا سنین.
گئتدین‌می؟ 
گئرییه دؤنمک ایستسن،
تیکان‌لی یاستیغا دؤنه‌جک یئرین.

گئتمک ایستییرسن
نه دانیش نه دین
یوخ اول اوزاقلارتک دومان‌دا چنده
نه‌ییمی سئومیشدین؟
دیه بیلمدین
ایندی‌ ایسه یۆز عیب گؤرورسن من‌ده

گئتمک ایستییرسن،
بهانه‌سیز گئت،
اویاتما مۆرگولو خاطره‌لری.
سسین همین سس‌دیر،
باخیشین اؤگئی،
گئدیرسن
سسین ده یاد اولسون، باری...