عؤمور-گۆن یولداشیما
فیکیرلی گلیرم، دالغین گلیرم،
قایغیلی گؤزلرین چکیر شکلیمی.
بعضاً گئج گلیرم، یورغون گلیرم
بیتیرسن قاپیدا بنؤوشه کیمی...
بلکه مین سوچومو بیلمیسن منیم،
بیرینی اۆزومه وورمامیسان هئچ.
ائیهاملا اۆزومه گۆلموسن منیم،
بیرجه یول اۆزومه دورمامیسان هئچ.
هر کس طالعیله گلیر حیاتا،
دئمیرم، اۆریی یومشاق اولموشام.
دجل اوشاقلارا مۆلاییم آتا،
سنینچون ان دجل اوشاق اولموشام.
سنسن داغلار کیمی صبرله دؤزن
بلکه ترددودله چوخ دؤیوشموسئن.
ایستی بیر سئوگیدئن یازمیشام بعضاً،
سویوموش چاییمی سن دییشمیسن...
اۆزومده کدردن بیر ایز گؤرنده،
شیرینیم اولموسان، آجیم اولموسان.
قوهومدان، تانیشدان پیس اۆز گؤرنده
سن آنام اولموسان، باجیم اولموسان.
بیر کؤورک شعریمدن گؤزلرین دولوب،
نه دئییم، اؤزگهدن چوخ یازیب قلم.
نه قدر دۆیونلو گۆنوموز اولوب،
دۆیونلو قاشینی گؤرممیشم من...
بیر الین مطبخده قابدا-قاشیقدا،
بیر گؤزون ایستیده، تۆستوده اولوب.
بیر الین بئشیکده اوغول-اوشاقدا،
بیر گؤزون همیشه اۆستومده اولوب.
یوللار چارپاز-چارپاز، یوللار قاریشیق...
گئجه یول گئدیرم قولاغی سسده.
بیزیم پنجرهدن سۆزولن اؽشیق-
گؤزومون نورودور یولومون اۆسته.
فیکیرلی گلیرم، دالغین گلیرم،
قایغیلی گؤزلرین چکیر شکلیمی.
بعضاً گئج گلیرم، یورغون گلیرم
بیتیرسن قاپیدا بنؤوشه کیمی...