آکواریوم

سو گؤز یاشیندان دورو،
لپه‌سی، دالغاسی یوخ.
اۆرک کیمی ایلیقدیر،
نه ایستیدیر، نه سویوق.
بورا نه تور آتان وار،
نه ده تیلوو ساللایان.
نه ساحیل قوملاری وار،
نه ده مین‌ایل‌لیک قایا.
قلبی کیمی ساغی دا،
سولو دا سویوق شۆشه،
عۆمّاندان قاچانلاری
بئله گؤردوم همیشه:
بالیغین دۆنیادان خبری یوخدور.
پنجره قاباغیندا
قایغی یوخوسوندادیر.
بو اۆزدویو سولاردا
یوخدوسا یوسون دادی
یادینا دا دۆشمه‌ییر.
عؤموردن آرخاییندی، -
باشقا بالیقلار کیمی
تاوادا کی، بیشمه‌ییر.
آنلاماییر هله او.
گرکسیزلیک دردینی.
آرخایین عؤمور سۆرمک
چوخ بؤیوک هۆنردیمی؟
بالیغین دۆنیادان خبری یوخدور.
یئم قایغی‌سی چکن وار،
بؤیوک بالیقلار اۆچون
اؤزو یئمه دؤنمه‌ییر.
قاسیرغادا، توفاندا
داشا دییب اؤلمه‌ییر.
ساکیت یاشاماق اۆچون.
بیر جام سو دا بسیدی،
بو سو اونا دۆنیادی،
بۆتون یئر کۆره‌سیدی؛
بالیغین دۆنیادان خبری یوخدور.