هر سینه آلتیندا بیر فعله اۆرک،
بعضاً اود غضبی سویودا بیلمیر.
اینسان «چاناغیندان» چؽخماسین گرک،
سونرا بَینسه ده قاییدا بیلمیر.
بیر ساکیت یول گئدیر بوستاندان باغا،
داشلار آیاق توتوب یئریییر سانکی.
بئله ترپنیشله،
چاناقلی باغا
سن هانسی آرزونا چاتمالیسان کی؟!
منزیلین بیچیلیب بویونا گؤره،
قورخولو دئییل کی، زیرِهلی دؤیوش؟
چاناغینی دییش ایلده یۆز کره،
نه نؤوبه لازیمدیر،
نه ده آراییش...
گز چاناق ایچینده...
ایندی کئفیندی،
قایغیدان اوزاقسان،
داها نه غمین؟
نئچه کی، دیریسن -
چاناق ائویندی،
اؤلنده تابوتون اولاجاق سنین.
ناز-نعمت ایچینده باتیب، بوغولان،
نه قدر ادالی چاغالار گؤردوم.
چاناغی اؤزوندن اوّل دوغولان
غریبه چاناقلی باغالار گؤردوم.
ایلک گؤروش یئرینده اسدی دوداغیم،
باخیب آیاغیما،
کؤنول وئرمهدی.
جؽریق باشماغیمدان چؽخان بارماغیم
نه قدر چالیشدیم قؽنا گیرمهدی...
کئف-داماق ایچینده ماشینی قووان،
داش بیلیب اۆستوندن آدلایاجاقدیر.
سئوینجدن چیچگی چؽتلایان جاوان
غملی چاناغینی چاتلاداجاقدیر.
... جئویز بالالارین قالدی بیر اتک،
قانینلا بویادی تکر کۆچهنی.
دییشیک آلینمیش آیاققابیتک
دئ، ایندی چاناغین سؽخمیر کی، سنی؟!
نه یوردونو دییش،
نه ده رنگینی،
باغلان، سۆروندوگون آنا تورپاغا.
آنجاق اۆزودؤنوک دوستلاریم کیمی،
قؽنینا چکیلمه، چاناقلی باغا!...