«قوی بیزیم خوروزوموز اؤزگهنین
قاپیسیندا بانلاسین...»
اۆزودؤنوکلر حاقیندا
اویدورولموش تسلّی.
(هلهلیک بیرینجی تمثیلیمدیر،
بلکه ده آخیرینجی اولدو).
خوروزوموز بانلادی
اؤزگهلر قاپیسیندا،
سحرین گلیشینی
اؤزگهلره دئدی او.
هر آخشام ائشهلندی
یادین کۆل توپاسیندا،
آنجاق بیزیم بوغدانی،
بیزیم دنی یئدی او.
قاپیسیندان قوومادی
یادلار بیزیم خوروزو،
خوروزسوز یومورتادان
جۆجه چؽخماز دئدیلر.
قاپیمیزدا داریخدی
چیل تویوغون اون «قؽزی»،
ساری فرهنی قویوب
بیزه باخماز دئدیلر...
خوروز اولمایان هینین
داشی، دیواری سویوق،
قؽسیلیب بیر-بیرینه
جۆجهلر تیترهییردی.
قانادینی دیزینه
هئی دؤیوردو چیل تویوق،
آی منیم بختیقارا
جۆجهلریم، دئییردی.
اؤزگهنین چپرینده
زیله چکیب سسینی،
چؽرپاراق قانادینی
بانلادی خوروزوموز.
هینیمیزده چیل تویوق
قؽساراق نفسینی
گؤزویولدا قالمیشدی،
قانمادی خوروزوموز.
سحر، گۆناورتا، آخشام...
گئجیکمهدی بان وئردی،
ساری لۆمک فرهیه
حیات وئردی، قان وئردی،
قاپیمیزدا چیل تویوق
خوروز دئیه، جان وئردی،
بیر دفعه ده هئچ اونو
آنمادی خوروزوموز.
قاپیمیزدا تزه دن،
بوزدار اۆچون یال واردی،
خوروز اۆچون فرهلر،
قازلار اۆچون گؤل واردی،
هینینه قاییت دئییب،
جۆجهلر چوخ یالواردی،
یئنه ده جۆجهلری
دانلادی خوروزوموز.
توتوب گتیردیک ائوه،
هئچ عینی آچیلمادی،
آیاغینی باغلادیق،
بیر گئجه قاچاممادی.
بو دؤنوکلوک نهدندیر،
نهدن، باش آچاممادیق،
سحر ساری فرهنی
یانلادی خوروزوموز…
... یئنه چؽخیب چپره
بانلاییر هارین-هارین،
قوی بانلاسین هله کی،
یاخشی سسی، اۆنو وار.
اؤزگهلر قاپیسیندا
بانلایان خوروزلارین،
اؤزگهلر تاواسیندا
بیشهجگی گۆنو وار...