بلکه گلن اولدو...

...واقونلاردا سؽخیلا-سؽخیلا
گلدیم شهره،
هئچ کسه توخونماییم دئیه
دیوارلارا سؽخیلا-سؽخیلا یئریدیم.
دۆز سؤزومو یاواش دئدیم،
یالانی ائله باغیردیلار کی،
حیاما سؽخیلیب کیریدیم.
قاپی گؤزلوگوندن باخیب
قاپی‌یا چؽخمادی قوهوملار،
الیمی بوش گؤروب
الیمی سؽخمادی قوهوملار.

کنده گلنده
آیاقلاری آلتینا
قوچ یؽخدیغیمیز،
آیاغیمین آلتینا
بیر پالاز دا
یؽخمادی قوهوملار.

نفسلرینی قؽسدیلار
قاپیلارین او اۆزونده،
بیر کؤلگه گؤرونوب چکیلدی
قاپیلارین شۆشه گؤزونده.
نئچه آدی دفن ائله‌دیم
آرزولار دوغولان اۆرگیمده،
زحمتین دادینی گؤردوم
اؤزوم قازاندیغیم
سویومدا، چؤرگیمده...
گۆلراۆزلو بیر طالع
دۆشموشدو قاباغیما؛
بیر تیکه چؤرکله،
بیر قورتوم سویلا،
بوش جیبله،
اۆرک دولوسو آرزویلا
یۆیوردوم صاباحیما...
ایندی منی گؤرنده
الیمی سؽخان قوهوملار،
تزه تاپیلان «دوغمالار»
یئردن چؽخان قوهوملار.
کؤهنه عۆنوانلاردا
یئنی آچیلان قاپیلار،
آرامیزدان دیوارتک.
سؤکولن، اوچولان قاپیلار،
گرک دئییلسیز منه.
سیزدن غملی بیر خاطیره قالدی...
آماندیر،
اؤرتولمه‌یین یئنه،
بلکه کنددن گلن اولدو...