گئتدی صمیمیّت...
بیز یالین قالدیق،
آپاردی اۆزوندن تبسّوملری.
هیجران دوغرو اولدو،
بیز یالان اولدوق.
ساختالیق آرایا گیرندن بری...
باری اؤز سؤزونو اۆرک دئدیمی
-دانیش،
بو سویوقلوق نهدندیر، بیلیم،
اۆزونده اۆچ خال وار
اۆچ نۆقطه کیمی،
یاریمچیق جۆملهیه بنزهمه، گۆلوم.
گئتدی صمیمیّت،
گئتدی آرادان،
اریدی، یوخ اولدو اوزاقلار کیمی.
باخیرام اۆزونه
حیرصلی آنادان
تبسّوم گؤزلهین اوشاقلار کیمی...
هله پاسلامناییب خاطیرهلر ده،
هله قلبیمیزده ایستی وار بیر آز.
بیر نغمه سسلنیر هئی پرده-پرده:
"گئتدی... او گۆنلره داها گۆن چاتماز!"
قلبیمه یامانجا دولوب شۆبههلر،
هئچ بئله دئییلدیم
نه اولدو منه؟
ایلک باهار یئنیدن قاییدیب گلر؛
چیچک - خاطیرهلر قالار چمنه.
بو حسرت بلکه ده ایلیق دوماندیر،
سن بیر قانادیسان،
من بیر قانادی.
وۆصالا نه وار کی،
حسرت یاماندیر،
دؤزولمز اولورموش قؽسقانجلیق اودو.
گئتدی صمیمیّت،
گئتدی آرادان،
اریدی، یوخ اولدو اوزاقلار کیمی.
باخیرام اۆزونه...
حیرصلی آنادان
تبسّوم گؤزلهین اوشاقلار کیمی.