طۆلوع ده قؽیمادیق پنجرهلره،
لۆت-عۆریان شۆشهلر نه گئیهجکلر؟!
سؤکوب خالچالاری دۆشوردوک یئره،
دیواردا میسمارلار اۆشویهجکلر.
آدیمی سؤکورم قاپینین اۆستدن،
قاپیمی کۆلکلر آچاجاق ایندی.
رشاد اوتوروبدور توپونون اۆسته،
سانکی مۆنهاوزن اوچاجاق ایندی.
نه واختسا بو ائوه کؤچدوک بیرینجی،
عؤمرومون بئش ایلی کیرهسی اولدو.
آرازین «زیندانی» - اوتاغین کۆنجو
داها هؤرومچکلر برهسی اولدو.
بیلمیرم نه قویوم،
نه آپاریم من،
سیزدهکی کدری دویوب گئدیرم.
بو ائوده ساکیتلیک آختاریردیم من،
ایندی ساکیتلیگی قویوب گئدیرم.
الوداع، دیواریم!
الوداع، داشیم!
سیزه نفسیم ده دیمهیجکدیر.
قاپیمی بیر دفعه دؤیمهین قونشوم،
داها دیواری دا دؤیمهیجکدیر.
سسسیزجه گلهجک آخشام بئلهجه،
اوتاقدا قارانلیق قاریاجاقدیر.
ایشیقلا قوودوغوم قاراگؤز گئجه
ساچینی ائویمده دارایاجاقدیر.
سئوینیر تزه ائو...
ایشیغی یانیر،
بو ایشیق ایچینده غریبیک هله.
کؤهنه ائویمیزدن کدر بویلانیر،
بورا قوناق کیمی گلیریک هله.
عؤمرونو یاشامیش بیر زاماندی بو،
کؤچری قالامیش سؤنن اوجاقدیر.
کؤهنه تانیشلارین تزه مکتوبو
منی بو عۆنواندا آختاراجاقدیر.
کۆسکون گلین کیمی بو ائو بوشانیر،
کیمی قؽزدیراجاق
بو اود، بو اوجاق؟
اینسان آغلایاندا
اۆرک بوشالیر،
ائولر بوشالاندا آغلاییر آنجاق؟...