تویلاردا «یانیق کرمی»نی اویون
هاواسی کیمی چالیب رقص ائدیرلر.
اوینایین، اونودون کدری، غمی،
قؤنچه اللرینیز گۆل آچیر، قؽزلار.
ایچیندن قوورولور «یانیق کرمی»،
آلیشیب اصلینین گیلئگی سؽزلار...
«واغزالی» چالینیر،
ساخلادیرسینیز،
«یانیق کرمی»یه سیفاریشمی وار؟
اصلینین روحونو آغلادیرسینیز،
کرمین دردینه اوینایان قؽزلار.
تاردان ناله قوپدو.
کامان اینلهدی،
کئشیشین یئنه ده عینی آچیلمیر.
سیزین یاخانیزین قؽریلدی بندی،
اصلیدن هله ده دۆیمه آچیلمیر،
کرم اود گؤتورور،
کرم آلیشیر.
ناغارا فرهادین کۆلونگ سسیدیر.
موسیقی بیر دردلی عشقدن دانیشیر،
هر صدا کرمین سون نفسیدیر.
ایچیمده چاتیلیب بیر اود، بیر اوجاق،
نئیلهییم، مجلیسدن چؽخا بیلمیرم.
درددن اوینایانی گؤرموشدوم، آنجاق
درده اوینایانا باخا بیلمیرم...
مجلیسین باشیندا قوشا شمع یانیر،
گؤزلدیر سئوگینی اود بزهینده؛
«یانیق کرمی»دن غم قانادلانیر
اۆرکده محبّت اؤلزیینده...
آلیشیب خوماردان سۆزولور گؤزلر،
گؤزلر باخیشلارلا اؤپوشهجکدیر.
اینصافینیز اولسون.
دایانین، قؽزلار! -
کرمین قبرینه اود دۆشهجکدیر.
مجلیسده دولانیر سیرلی بیر کؤلگه،
لئیلینین باغرینی اۆزهجکسینیز.
بیر واخت گلهجک کی،
دئییرم، بلکه
مجنونون آهینا سۆزهجکسینیز...