درد

دردینی سویا دانیشما،
آخیب چؤللر بویونجا
دردی چیچکلر بیتیره
دردینی قویویا دانیشما.
بند-بند کسیلمیش
تۆتکلر بیتیرر.
دردینی منه دانیش،
درد قدرینی دردلی بیلر...
دردینی اولدوزلارا دئمه،
اوزاقلیغین دردی
اونلارا بسدی.
دردینی منه دئ،
اۆرگیم دردلره قفسدی.
اوردا هئچ کسین گؤرمه‌دیگی
درد شکلیندن سرگی وار،
دردین منه ارکی وار؛
یایدا سویوق باخیشلاردان اۆشوین،
قؽشدا یالانچی سئوینجلردن تیکیلن
ایینه‌باتماز کۆرکو وار.
دردینی منه دانیش،
دردبیلمزه سؤیله‌مه،
سنه تزه درد دوغار.
دردینی منه دانیش،
دولو دریایا یاغار...
دردین اۆزه‌گولنی پیسدی،
دردین غفیل گلنی پیسدی.
کور قارانلیغا آلیشان کیمی
دردلی دوغولان درده آلیشیر.
کیم دردینی سویا دانیشیر؟
دردینی منه دانیش،
اؤزوم درده ساری گلیرم.
ناظیم حیکمت دئمیشکن:
«آدام وار اوتلارین چئشیدینی بیلیر،
آدام وار قوشلارین،
من دردلرین چئشیدینی بیلیرم!»
... درد اوخوموشام
آنامین قایغیلی گؤزلرینده،
ننه‌مین «دردین منه گلسین» - سؤزلرینده،
یارالی دووشانین
قانلی ایزلرینده،
پاریسین سنت دِنی کۆچه‌سینده‌کی
مۆشتری گؤزله‌ین قادینلارین
چؽلپاق دیزلرینده...
قاچقینلارین
وطنه ساری دؤنن اۆزلرینده،
قاریمیش قؽزلارین
توز باسمیش گۆزگولرینده...
دردینی منه دانیش،
درد قدرینی دردلی بیلر...