ذره-ذره عضووم هر بیری بیر یئرده دیر

عاشیقه صوبح اومیدو شام هیجران دیر خیال،
بولبول مهجوره هم گول، هم گولوستان دیر خیال.
درد-درمانلا توأم دورور، اگر بینا ایسن،
هر قدر کیم، وصل دیر دشوار، آسان دیر خیال.
گاه یوخ یئردن آچار یوز غم نقابین چؤهره دن،
گاه یوز مین درد بیدرمانه، درمان دیر خیال.
هر کیمین حالینجا، منظورینجه، مقصودینجه دیر،
گاه کشتی، گاه لنگر، گاه توفان دیر خیال.
بیلمنم کیم، هاندایام من، یئرده یم، یا گؤیده یم،
پس مشوش دیر دماغ، ازبس پریشان دیر خیال.
اهل همت میهمانسیز قالماغی دشواردیر،
شوکرلله کیم، گؤزو کؤنلومده مهمان دیر خیال.
هر نه گلسه عاشیقه دیلداریدن، دیلداردیر،
دوشمه سه جانان اله جان چکمه، جانان دیر خیال.
انس و جن و دیو و دد واری مسخردیر اونا،
ظاهراً کیم، خاتم «مولک سلیمان» دیر خیال.
آنلایان بیر نقطه دن یوز مین کتاب آنلار سؤزوم -
کیم، کؤنول بیر قطره دیر، دریای عمان دیر خیال.
ذره-ذره عضووم هر بیری بیر یئرده دیر،
بس کی، قؤوسی آرزو جمع و پریشان دیر خیال.