کی، گردشیندن اونون کیم کی، وار، ائدر فریاد

گلیر باهار، آچیلیر گول، هزار ائدر فریاد،
بو عندلیب خزان و باهار ائدر فریاد.
فغان کی، حالیمه او داش باغیرلی رحم ائتمز،
اگرچی ناله م ایله کوهسار ائدر فریاد.
اؤزو سالیر اؤزون اوددان-اودا سپند کیمی،
زبان حالیله هر کیم شعار ائدر فریاد.
بو هرج-مرجده هئچ بیلمیرم نه غوغا دیر –
کی، مست ناله قیلیر، هوشیار ائدر فریاد.
بو عینه اؤیله کی، اوددان سپند ناله چکر،
سنی گؤرن کیمی بی اختیار ائدر فریاد.
نه نوع کیم، داغی دیر توند باد خار و خسی،
بیان حوصله می تارمار ائدر فریاد.
جرس کیمی ییغارام گرچی ناله دن دیلیمی،
یوز اول قدر بو دیل بیقرار ائدر فریاد.
کیمین مرادی ایله بس فلک دؤنر، یارب –
کی، گردشیندن اونون کیم کی، وار، ائدر فریاد.
سپهر چرخه دوشر گردباد تک قؤوسی،
نه سرزمینده کی، بیر بیقرار ائدر فریاد.