بؤیویوب بو کؤرپه ایلان بالاسی،
گاه او باشا، گاه بو باشا سۆرونور.
سئوینیر اوددوغو هاوایا، سویا،
تورپاغا سئوینیر،داشا سئوینیر.
بیر سئوگی هوسی دولور جانینا،
گئجهلر گؤزونون ایتیر یوخوسو.
چیچگین قوخوسو،
اوتون قوخوسو،
کۆلگین نفسی دولور جانینا.
اؤزوندن خبرسیز،
سسسیز-سمیرسیز
زهره چئوریلیر جانیندا هر شئی.
بو ایلان بالاسی بیر واخت
جانیندا گیزلنن زهردن خبر توتاجاق.
بلکه قارغییاجاق
باختینی اوندا،
بلکه بوغازینی
قهر توتاجاق.
آغلاما، آغلاما، ایلان بالاسی،
باختینی قارغیما، ایلان بالاسی!
بو دا بیر عؤموردو،
دؤزهسن گرک،
بئلهیمیش طالعین امری، بویروغو؛
دؤشونون آلتیندا
سئون بیر اۆرک،
دیشینین آلتیندا
زهر تولوغو.
گؤرنلر چؽغیرار:
- ایلان وار، ایلان!..
قوودوقجا قووارلار سنی دۆنیادا.
هر یاندان کسیلر
یولون-یولاغین،
تک بیرجه یول قالار سنه دۆنیادا؛
باشیندان
قویروغوناجان،
زهرلی دیشیندن
قویروغوناجان
تک بیرجه یول قالار، -
او یول اؤزونسن،
اؤزون اؤز یولونسان، ایلان بالاسی.
هارا قاچاجاقسان
گؤز قاباغیندان،
بو ظالیم دۆنیایا نئیلهیجکسن؟
یۆز یول چؽخاجاقسان
اؤز قابیغیندان،
اؤزوندن آیریلا بیلمهیجکسن.
اؤیرن،
یاواش-یاواش اؤزونه اؤیرن،
دۆنیانین هر جۆره اۆزونه
اؤیرن.
باریش جانینداکی زهرلی دردله،
اییرنمه اؤزوندن، ایلان بالاسی.
بلکه ده، ان آجی حقیقت ائله
سنسن یئر اۆزونده، ایلان بالاسی.
سنسن حاقین یولو بو یئر اۆزونده،
تانری اؤزو سئچیب بو یولو بلکه.
یۆز جۆر صیفتییله، یۆز جۆر اۆزویله
دۆنیا سندن کئچیب دورولور بلکه.