هر سحر گؤزلریمی آیدینلیغا آچیرکن
اؤزلویومدن سویونورام
قوندارما گولوش قونور دوداغیما
«تانری گولنده دونیانی یاراتمیش!»
مین ایل اؤنجه افریقالی بیر فلسفهچی سؤیلهسه ده بو سؤزو
فلسفه یوناندان باشلانمیش
و مدنیت، سومر آتا- آنالاریمیزدان
اورتا عصیرده
دوشونجهمیز چیراق توتوب اوروپانین قارانلیق چاغینا
و آلمانیا،
دوغوب فلسفهنین فاخیر دیلینی
بیز ایسه
بیر دیلیملیک فلسفه بئله
کلمه کسمیر دیلیمیز
هاوادان سؤز قاپیریق
آنجاق دانیشیریق، دیلدن دوشوروک
قاچ ها قاچ
نالسیز آتلاریمیزی چاپدیریریق سانال دونیادا
قزئتلر باریت باغلاییر خبر تیترلرینه
یان کئچیریک!
سؤزلر اینتحار ائدیر گؤز اؤنونده
گؤرموروک!
آنجاق بویلانیریق
استاتوسلانیریق
گؤز آتیریق
بیر پای بو حکایهدن، ایکی پای او شعردن
سؤز آتیریق
رمانتیزم چیرکینلهشیر
شیرینلییی خیمیر- خیمیر اَکیلیر بارماقلاریمیزین آلتیندان
بونونلا بئله
شکیللریمیز حقیقتیمیزدن گؤزل گؤرونور سانال دونیانین پنجرهسینده...
گئجهنین یاریسیندا زامان کؤینک دَییشیر
اؤزگهلیییمی سویونورام
اؤزلویومو گئیینیرم
سحرین خیالیایلا، یوخویا دالیرام.
خرداد- 1393