آذربایجان

ائل بیلیر کی، سن منیمسن،
یوردوم، یووام، مسکنیمسن،
آنام دوغما وطنیمسن!
آیریلارمی کؤنول جاندان؟
آذربایجان، آذربایجان!

من بیر اوشاق، سن بیر آنا،
اودور کی، باغلی‌یام سانا،
هانکی سمته، هانکی یانا
هئی اوچسام دا یووام سنسن،
ائلیم، گۆنوم، اوبام سنسن!

چوخ کئچمیشم بو داغلاردان،
دورنا گؤزلو بولاقلاردان!
ائشیتمیشم اوزاقلاردان
ساکیت آخان آرازلاری،
سؽنامیشام دوستو، یاری...

فقط سندن گئن دۆشنده،
آیریلیق مندن دۆشنده،
ساچلاریما دن دۆشنده.
بوغار آیلار، ایللر منی،
قؽناماسین ائللر منی.

داغلاری‌نین باشی قاردیر،
آغ اؤرپگین بولودلاردیر.
بؤیوک بیر کئچمیشین واردیر.
بیلینمه‌ییر یاشین سنین،
نه‌لر چکمیش باشین سنین.

دۆشدون اوغورسوز دیللره،
نحس آیلارا، نحس ایللره.
نسیللردن نسیللره،
کئچن بیر شؤهرتین واردیر.
اوغلون، قؽزین بختیاردیر...

هئی باخیرام بو دۆزلره،
آلا گؤزلو گۆندوزلره.
قارا خال آغ اۆزلره،
کؤنول ایستر شعر یازا؛
گنجلشیرم یازا-یازا...

اؤلمز کؤنول، اؤلمز اثر،
نیظامیلر، فیزولیلر
الین قلم، سینه‌م دفتر،
دئ گلسین هر نیین واردیر.
دئییلن سؤز یادیگاردیر.