گل، اللهی سئورسن، زاهدا، سون بو ریادن کئچ

وفا رسمین توتوب گل، ای پری، جور وجفادن کئچ،
اگر آدمسن، انصاف ائت، بو وضع ناروادن کئچ.
گؤزوم یاشیندان، ای سرو روان، رنجیده اولموشسان،
بو تأثیر سیتارم دیر، گلیب اول ماجرادن کئچ.
پریشانلیقدان اول زلفو دئدیم دون نافۀ چین دیر،
چئویر اؤز باشینا، ای گول، منی، سن اول خطادن کئچ.
دهان یاردن بیر سؤز تمناسینده سن چوخ دان،
نه چیخسین یوخ دان، ای دل، بیر اوسان، بو مدعادن کئچ.
حصیری آلت تزویر ائدیب اگلشمه مسجیدده،
گل، اللهی سئورسن، زاهدا، سون بو ریادن کئچ.
صفای خاطر اولماز عاشیقه میخانه سیز، ای دل،
اگر بو کعبه دن چکدینسه ال، بس گئت صفادن کئچ.
جاهان ملکونده، سیّد، یوخدو بیر احسان بی منت،
شکسته خاطره صبرایله‌ییب، اول مومیادن کئچ.