سیّد، او مه دن اؤترو چوخ ائتمه مباحثه

ائیلر شراب لعل لبینله مدام بحث،
گون تک بو روشن اولدو کی، ائیلر حرام بحث.
ناپخته دیر دئین تنوه سیم خام دیر،
صراف لر یانیندا نه لازیم بو خام بحث.
اهل کلامه سرّ کلامین آچیلمادی،
بیر نکته اوسته ائتدیله مالاکلام بحث.
هردم قیلیب وجود عدمدن حکایه لر،
رمز دهانین ایله ائدر خاص وعام بحث.
زلفو روخون حکایتی یئتمز نهایته،
گر ائتسه‌لر سفید وسیه صبح وشام بحث.
من کوی یاری، زاهد، اگر کعبه دیر دئدیم،
فرض اولمادی کی، سن ائده سن بی مقام بحث.
سیّد، او مه دن اؤترو چوخ ائتمه مباحثه،
ناقص قالیر زمانه ده، اولماز تمام بحث.