شوق لعلیندن اونون، ای خسرو شیرین زبان

دون ائشیتدیم بیر سیه زلفه گرفتار اولموسان،
ای ملک صورت، منیم تک عاشیق زار اولموسان.
وئرمیسن بیر سنگ دل دلداره نازیک کؤنلوو،
سن مگر کؤنلوندن، ای مهپاره، بیزار اولموسان؟
چکمیسن جانان جفاسین، گؤرموسن هجران غمین،
شکر لیللاه، حالیما، ای گول، خبردار اولموسان.
گؤرموسن آیینۀ وجهینده عکس صورتین،
طاقت و هوشون گئدیب، بیر نقش دیوار اولموسان.
شوق لعلیندن اونون، ای خسرو شیرین زبان،
سیّد شیرین سخن تک صاحب اشعار اولموسان.