دون شمار ائیله دیک عالم دکی دیوانه لری

تا کؤنول صیدینه صیاد او گؤزو قاش اولدو،
عالمه راز نهانیم داغیلیب فاش اولدو.
زلف ترارین اولوب گؤزلرینه یار، آخر
بو قارا اوغرو حرامی لره یولداش اولدو.
نه بلا لر گتیریر باشیما بو دیدۀ تر،
بو نه طوفان، بو نه گیرداب، بو نه یاش اولدو؟
ای خوشا نقشینه اول عاشیق حقبینین کیم،
نقش دن پئی آپاریب عاشیق نقاش اولدو.
ائشیکین داشنا تا دگدی رقیبین قدمی،
ائویم اول لحظه ییخیلدی، باشیما داش اولدو.
صدف سینم آرا بسلدیگیم گوهر ناب،
حیف تاراجا گئدیب قسمت اوباش اولدو.
دون شمار ائیله دیک عالم دکی دیوانه لری،
آخرالامر بو سیّد هامی دان باش اولدو.