گئتدی سیّد دولانا کویین او خالی حجرین

نئیلرم گولشنی کیم، اول گول احمر گئتدی،
گؤز یاشیم جویه دؤنوب سرو سنوبر گئتدی.
آه و ناله دمیدیرایله فغان، ای بولبول،
قالدی یوز خار بو گولشنده، گول تر گئتدی.
گئتدی اول جوهر جان، قاچدی منیم رنگ روخوم،
بو ارز اولدو تلف، آه، او جوهر گئتدی.
دوشه جک دیر دخی مین بعد ایشیم نقصانه،
توتولوب، مندن او مهپاره مکدّر گئتدی.
غرق ائدیب اشک منی، آتش رخساروی آچ،
سن قربان اولوب، الدن بو سمندر گئتدی.
یئنگی آی تک گؤرونوردو قاشی، زلف آلدی اونو،
آه! ابر آلتینا اول ماه منور گئتدی.
تا کی، اؤپدوم لب جان پرورین اول حور وشین،
خاطریمدن هوس چشمۀ کوثر گئتدی.
گئتدی اول یاسمنی زلف، سالیب یاسه منی،
یاسیمه باعث اولوب، آه، او سمنبر گئتدی.
گئتدی سیّد دولانا کویین او خالی حجرین،
حیف کیم، کعبه طوافینه او کافر گئتدی.