او قدر آغلادیم اول ماه غمیندن، سیّد

شب هجران او قدر نالو افغان ائتدیم،
تا کی، چشم فلکی حالیما گریان ائتدیم.
گؤرجک اول صورت زیبانی اؤزومدن گئدیبن،
صورت حالیما صورت کیمی حیران ائتدیم.
بو تمناده ایدیم کیم، اولا جان قربانین،
شکر لیللاه کی، آخر سنه قربان ائتدیم.
ائیله‌دیم درد و غم هجره اؤلومدن چاره،
گؤر نه آسان بو قدر موشگوله درمان ائتدیم.
تا دئدیم عاشیقینم قهرایله تؤکدون قانیم،
عاشیق اولدوم سنه، ای ماه، مگر قان ائتدیم؟!
اولدو قتلیمده پشیمان، پشیمانم کیم،
ناله ایله اؤزوم اول ماهی پشیمان ائتدیم.
او قدر آغلادیم اول ماه غمیندن، سیّد،
عاقبت نوح کیمی عالمه طوفان ائتدیم.