زخم سیتمین اولمادی بو سیّده کاری

بیر دم منه باخ، ای گؤزو بیمار، اؤلورم من،
چشمیندن ایراق، ای گول تر، خوار اؤلورم من.
زنجیرده بیر کیمسنه جان وئرمه‌دی من تک،
اول سلسلۀ زلفه گرفتار اؤلورم من،
مست اولمادیغیم دم یوخ ایدی دهرده بیر گون،
صد حیف، اؤلن وقتده هوشیار اؤلورم من.
قورخوم بودو گؤرسم سنی لذت تاپا چشمیم،
شادم کی، بئله حسرت دیدار اؤلورم من.
دئوریمی توتوب غصه و غم، محنت عالم،
سانما کی، بئله بی کس و بی عار اؤلورم من.
یوخ طاقتیم اغیارایله گؤرمک سنی، ای شوخ،
اؤلمکده بو گون بیر غرضیم وار، اؤلورم من.
زخم سیتمین اولمادی بو سیّده کاری،
صد حیف، صد افسوس، گونه کار اؤلورم من.