اول پری دن چک دئدیم ال، پندیمی گوش ائتمدین

تا کی، سن اولدون اسیری زلف یارین، ای کؤنول،
قاره اولدو یار الیندن روزگارین، ای کؤنول.
یوز جفا گؤردون، ولی، بیر گز شکایت ائتمدین،
هانسی لطفوندن خجیلسن نازلی یارین، ای کؤنول.
نه امید ایله، گئنه دلبر سنه وئرمیش فیریب
کیم، فرح ناک اولموسان، یوخدور قرارین، ای کؤنول.
یوخسا اغیارایله گؤرموشسن گئنه مه پاره نی؟
بنزه مز هرگونکونه بو آه و زارین، ای کؤنول.
گر او آهوگؤز دوشه عالمده بیر گون داموه،
سان غزال چرخ اولور یئرده شکارین، ای کؤنول.
آلدی عقل و هوشوی شوق دهانی دلبرین،
گئتدی الدن یوخ یئره مجموع وارین، ای کؤنول.
خوب لر زلفینه قویمازدیم سنی بند اولماغا،
منده اولسایدی اگر کیم، اختیارین، ای کؤنول.
اول پری دن چک دئدیم ال، پندیمی گوش ائتمدین،
ناله دیر سیّد کیمی ایندی مدارین، ای کؤنول.