منو
عالمین درد و غمیندن خبریم یوخ، سیّد
تا او ماهین خط و خالینه نگاه ائیلهمیشم،
گونومو عشقله عالمده سیاه ائیلهمیشم.
لرزه ائیلر بدنیم کورۀ سیماب کیمی
کی، باخیب آیینۀ حسنونه آه ائیلهمیشم.
گؤز یاشیله لب دلداردن آلدیم بوسه،
سو قاتیب بادۀ گولفامه گناه ائیلهمیشم.
چوخ دا نادان دئگیلم، آنلاماییم خیرو شریم،
مئیه صرف ائتمه ین اوقاتی تباه ائیلهمیشم.
نئیلرم آیو گونو، تک مئیم اولسون، عرقیم
کی، بونو مهر درخشان، اونو ماه ائیلهمیشم.
اؤپموشم گون کیمی من خاک در دلداری،
هر زامان کیم، طلب روفعت و جاه ائیلهمیشم.
عالمین درد و غمیندن خبریم یوخ، سیّد،
من کی، میخانه نی ایللردی پناه ائیلهمیشم.