دیلی زخمدار سیّد یئته گر او قاره زلفه

قادان آلیم، آی قارا گؤز، سنه بو ادا نئچین دیر،
نه اوزوقارالیق ائتدیم، منه بو ایضا نئچین دیر؟
سنه آل دون یاراشیر، نیه گئیمیسن قرا سن،
مگر عاشیقین اؤلوبدور، سنه بو عزا نئچین دیر؟
یاناغیندی لاله نسبت، دوداغین عقیق مانند،
بدنین سفید صافی، بس آدین قارا نئچین دیر؟
منه آد قارا گرک دیر کی، منیم گونومدو قاره،
بو آد آی وفالی دلبر، دئ گؤروم سانا نئچین دیر؟
سنه عاشیق اولسا هر کس، اولو قاره بخت بیللاه،
یوخ ایسه بو آد سنینچون صنما، شها، نئچین دیر؟
دیلی زخمدار سیّد یئته گر او قاره زلفه،
دخی قاره لازیم اولماز، اونا بس دوا نئچین دیر؟