گؤر اغیارایله یارینی اؤلمز

من اؤلدوم، اوستومه دلدار گلسین،
آچیب باشین او سونبول تار گلسین.
آچیب نطق، ایله سین یوخ دان تکلم،
تنیمده بیر نفس تا وار گلسین.
اگرچی اختیاری بیرله گلمز،
ائدین اول سرکشی ناچار، گلسین.
قیلین احوالیمی جانانه روشن،
بو ظلماته او مهرخسار گلسین.
کی شاید رفع ائده درد سریمی،
ایاغ الده، مئی سرشار گلسین.
دهانیمه نفس تشخیصی اوچون
توتوب آیینۀ دیدار، گلسین.
جنازم اوستونه گلسین امامیم،
نامازه جعفر طیار گلسین.
بو تعمیر دل اولدو خاکه یکسان،
دئین تعمیره اول معمار گلسین.
اگرچی، بیلمیشم گلمز او گولروخ،
یانیر ناره، دئین، بو خار گلسین.
نولور، بار خدا، بو خانگاهه
چیخیب اول شاهد بازار گلسین.
گؤر اغیارایله یارینی اؤلمز،
ایلاهی، سیّده بیر عار گلسین.