منیم فصل خزانیم دیر کیم، اول رشک باهاریم یوخ

باهار اولدو، کؤنول لر شاد اولان موسومدو، یاریم یوخ،
باشیمدا نشۀ مئی، الده جام خوشگواریم یوخ.
سن، ای بولبول، فغان ائت گول دن اؤترو صحن گولشنده،
منیم نطقیم توتولموش دور کی، یار گولعذاریم یوخ.
سنین دؤندو خزانین، وصل گول دن نوباهار اولدو،
منیم فصل خزانیم دیر کیم، اول رشک باهاریم یوخ.
آچیلدی غنچه، بولبول وصل گول دن یئتدی دیداره،
ائدیب چاک گیریبان اؤلمزم من، هیچ اریم یوخ.
نه نقدیم وار مئ نابه، نه رهن جامه دستاریم،
بتر اوندان بو کیم، میخانه لرده اعتباریم یوخ.
نه ترغیب ایلییرسن جنّته هردم منی، واعظ،
منیم باغ بهشتیم یاردیر، جنّتده کاریم یوخ.
حذر قیل، یاخما دلده آه اودیله ناوکین، سیّد،
منیم اول قاشی یای دان بوندان اؤزگه یادگاریم یوخ