ای نخل ملاحت، بیزه اصلا ثمرین یوخ

ای زاهد خودبین، بیلیرم کیم، هنرین یوخ.
میدان محبت طرفه بیر گذرین یوخ.
محرابده اگلش کی، جگردار دئگیلسن،
بو نار غمه یانماغا اصلا جگرین یوخ.
تا موخبیر عشق اولدو کؤنول، بیخبرم من،
زاهد، خبریم یوخ، بو خبردن خبرین یوخ.
سن ایله پری، حور خیالیله عبادت،
بزمینده اله نقد بت سیمبرین یوخ.
ای زاهد خشک، ائیله‌مه عشاقه تفاخور،
آه سحرین، سوز دلین، چشم ترین یوخ.
نه وصل و نه آغوش و نه بیر بوسو کنارین،
ای نخل ملاحت، بیزه اصلا ثمرین یوخ.
ای دل، ائله دین جنّت کویینی تمنا،
اوچماغا هانی، حیف، سنین بال و پرین یوخ.
بسدیر سنه رخسار زر و اشک چو سیمین،
سیّد، نه غمین، گرچی سنین سیم و زرین یوخ.