گر صبادن ترۀ تارین پریشان اولماسا

جان نه لازیم دیر، اگر منظور جانان اولماسا،
بسدی جانانین خیالی، غم دئگیل، جان اولماسا.
نفس عماره ائدر ترغیب خلقی ذلته،
میل عصیان ائتمز ایدی کیمسه شیطان اولماسا.
ای کؤنول، دایم ائله شیطان اینسی دن حذر،
کفرده فرعونی گؤر، قالمازدی هامان اولماسا.
مجمع اهل دل اولمازدی پریشان دهرده،
گر صبادن ترۀ تارین پریشان اولماسا.
سورۀ واللیل زلفون دور، یوزون والشمس دیر،
غم دئگیل عالمده بوندان غیری قرآن اولماسا.
سیّدا، ایمان گتیر رخسار یاره، بیل یقین،
هر عمل ائتسن قبول اولماز گر ایمان اولماسا.