بیر دوستون مکتوبونا جاواب

بیر دوستون مکتوبونا جاواب

السلام، ای گول گولزار وفا!
السلام، ای گوهر بحر عطا!
ای سالان یاده من حیرانی،
سنه قربان بو حزینین جانی!
هر زامان کی، فلک شبعده باز
وئرمیش ایدی منه مین سوز و گداز،
اول گول گولشنیمین هیجرانی،
منه تنگ ائتمیش ایدی دنیانی.
همدمیم ناله و فریاد و فغان،
گؤز یاشینی سیل تک اولموشدو روان.
چوخ پریشان ایدی غمدن حالیم،
کافر آغلاردی گؤره احوالیم،
خاطریم هجرده مشغول خیال،
گؤزلریم منتظر راه وصال.
ناگهان نامۀ یار کامل
منه بیر شخص دن اولدو واصل.
اؤپوبن نامه نی قویدوم گؤزومه،
گلدی جان جسمیمه، طاقت دیزیمه.
وه، نه مکتوب گولوستان ارم!
وه، نه مکتوب، گول باغ کرم!
وه، نه مکتوب کی، باب رحمت!
صفحه سی صفحۀ باغ جنّت.
سطرلر سانکی خیابان بهشت،
ائتدی نامه ن منی مهمان بهشت.
نقطه سی مردمک دیدۀ حور،
وصفینی ائتمه یه اقومده قصور.
اوخودوم نامه نی، اولدوم احیا،
ائتدی نوح اوغلونو احیا عیسی.
سانکی بیر پیرهن یوسف ایدی،
چشم یعقوبی منور ائله دی.
هر سوادین اوخودوم، جان تاپدیم،
خیضر تک چشمۀ حیوان تاپدیم.
بار ایلاها، اولاسان شاد مدام،
منی شاد ائیله دین، ای فخر کرام!
ائیله‌ییب خرم و خندان منی،
ائیله دین عالمه سلطان منی.
سن گؤروم عالمه سلطان اولاسان!
تخت عزتده سلیمان اولاسان!
ائیله دین من کیمی بیر موره کرم،
ائتمه سین لطفونو حق سندن کم.
وار امیدیم کی، خداوند غفور،
ائده من بی کسه وصلین مقدور.
یئنه وصلیندن اولا شاد کؤنول،
اولا بو غصه دن آزاد کؤنول.
گله بو مرده اولان جسمیمه روح،
آلا ساقی لر اله جام صبوح.
یئنه برپا اولا بزم عشرت.
جان تاپا لعل لبیندن لذت.
دایم ابر ایچره گون اولماز مستور،
چیخیب آخردا وئر عالمه نور.
بیر قرارایله دئییل چرخ مدار،
گاه اولور فصل خزان، گاه باهار.
یئنه گوت لر آچیلیر، یاز اولور،
یئنه بولبول گوله دمساز اولور.
وصلوه جان یئتر انشالله!
بو بلالر بیتر انشالله!
تا تسلی تاپا دل هجرین آرا،
بیر غزل تازه دن ائتدیم انشاء.
وار امیدیم اوخویوب شاد اولاسان،
هجره صبر ائتمه یه معتاد اولاسان.