آغا میرجعفر حاجی سیّد عظیم اوغلونا

آغا میرجعفر حاجی سیّد عظیم اوغلونا

نور چشمیم، زاد عمر العزیز، حالی تحریر کی، سلخ ماه ذی الحجه الحرام دیر، لیل الحمد والمنه جناب آغا بئیین خدمتینده صبح و شام وارام. اگرچی گلمه ییم بو سفر طول چکدی، نور چشمیم، تنگدل اولما. مصلحت بئله دیر. چونکی خانلیقدان نصیر خان بورایا گله جکدی، اونا بیناعن بئی منی بورادا ساخلادی کی، تا خان گلسین. هله ده کی، خان گلمه‌ییب دیر. انشالله، امیدوارام قربان بایرامینا شهره گلیم. اگر بایراماجان گلمه سم، بایرامدان سونرا انشالله، گللم، خاطرجمع اولاسان. توقع ائیله ییرم کی، یاخشی دولاناسان؛ آنانی اینجیتمه یه سن، یولداشلاروو اینجیتمه یه سن، اوخوماغا سعی ائله یه سن:

ای اوغول، بو دلیل بی شک دیر:
“آدم بی سواد ائششک دیر”،

و مندن الکبر عمی یه و موللا جلالا عرض سلام ائلرسن. و من دکی قوجا آتی جناب آغا بئی اؤزگه یه باغیشلادی. پیادا قاتمیشام. گرک نئجه اولو. و بوز آتی قارا بئیه باغیشلادی. الله کریم دیر، بلکه اوندان یاخشی سی اولاجاق؟ هر حالدا، اللها شکور ائله مک و آغا بئیین عمر شریفمه دعا ائله مک بیزه واجب دیر. الله اونا طول عمر کرامت ائله سین.
والسلام!
تحریرون: فی السلخ ذی الحجه، سنه ۱۲۹۲٫
حاجی سیّد عظیم،
(مؤهور): سیّد عظیم علوی.