کیم، اونون هم بئله یوز یوسف خوشخولاری وار

شهر شیروانین عجب دلبر دلجولاری وار،
گول بدن، غنچه دهن، ساده و مهرولاری وار،
بو خطا ملکودو، هریاندا چوخ آهولاری وار،
یوز لبی شهد و فکر، زلفی سمنبولاری وار،

یوز قدی سرو سهی، گؤزلری جادولاری وار.

هر نه بو شهرده کیم وار ایسه چوخ مهرولار،
هر بیری بیر کسه بیر نوع ایله دلجولوق ائدر،
هر زامان عاشیقه یوز لطف ایله میل ائیلرلر
بو ملک روی و ملک خوی و ملک سیما لر،

یاخشی خاصیتی، چوخ یاخشی گؤزل خولاری وار.

خامۀ سون وئریب گؤر نئجه رونق بولارا،
یاراشیر شیوۀ محبوبلوق آنجاق بولارا،
دسترس اهل شاماخی اولوب الحق بولارا،
بئله نعمت لری کیم، قسمت ائدیب حق بولارا،

بیلمیرم من بولارین داخی نه قایغولاری وار.

بونلارین جمله سی نین شیوۀ رفتاری گؤزل،
خولقو خوش، خویی پسندیده، هر اطواری گؤزل،
چشم خومماری گؤزل، ترۀ تراری گؤزل،
گول رخساری گؤزل، لعل شکرباری گؤزل،

هامی سیندان بو گؤزل کیم، یوموشاق سولاری وار.

چوخدو بو شهرده گرچی صنم لاله عذار،
بولارین لیک، بیر آیینه بدن سروری وار،
عدد اسمی دیر ابجدله “صد و بیست وچهار”.
مژه سی ناوک دلدوزدو، چشمی خونخوار،

حبّذا، یایی مقوّس کیمی ابرولاری وار.

آه، کیم، سیّد اونون عشقی ایله زار اولدو،
دام گیسوسونا پابند و گرفتار اولدو،
او ایاز ایدی کی، محموده گئدیب یار اولدو،
گئنه بو دور یتیمه او خریدار اولدو –

کیم، اونون هم بئله یوز یوسف خوشخولاری وار.