جاهانه ائتدی تجّلا جمال صبحانی

مگر بنفشه معطر قیلیب گولوستانی،
نسیم جونبوشو تپرتدی شاخ ریحانی،
شمیم مشک توتوب صفحۀ بیابانی،
و یا داغیتدی صبا تار زلف جانانی –

کی، توتدو عطری سراسر تمام دنیانی.

سحاب دن یوزونو آفتاب ائدیب اظهار،
تجلی ائیله‌دی یا شاخ توردن انوار
و یا جاهانه گلیب حوریان گولرخسار
و یا کی زلف آراسیندان گؤروندو چهرۀ یار،

فروغ طلعتی ائتدی جاهانی نورانی.

گؤروندو عالمه یوخسا علامت محشر
و یا قیامت عظمادن اولدو یوخسا خبر،
بلای ناگه ائدیب دیر نزول خلقه مگر
و یا خورامه گلیب سرو قامت دلبر –

کی، اضطرابه دوشوب خلق اولوبدور حیرانی.

مگر مسخر اولوب اهل کفره قیبلۀ دین،
اولوبدو کفره مبدل بساط روی زمین
و یا سپاه خواریج اولوبلا کعبه نشین
و یا کی غمزۀ دلبر چکیبدی خنجر کین –

کی، گئتدی خلقین الیندن اساس ایمانی.

جاهاندا آب بقادن مگر گؤروندو نشان
و یا دوباره مسیح ابن مریم اولدو عیان،
یئتیشدی حکم بقا، یوخسا حکم بی مکان
و یا آچیلدی تکلم ایله لب جانان،

یئتیردی فرقۀ امواته مژدۀ جانی.

اولوبدو ملک جاهان قصط و عدل دن معمور،
دؤنوبدو ساحت خولد برینه وادیی تور،
یاخیبدی چوخ لاری موسی کیمی تجلی نور،
مگر کی، حجت عصرایله‌ییبدی عصره ظهور،

جاهانه شامل اولوب فیض ذات ربانی.

آماندی چک الوی، سیّدا، معمادن،
جاهانی شبهه یه سالما اشاره، ایمادن،
گؤتور نقاب روخ شاهد دل آرادن،
گؤروندو نور بها کوه تور سینادن،

جاهانه ائتدی تجّلا جمال صبحانی.