منو
مرحبالار سنه، ای شاعر اعجازسخن
قاسمیم، زلف خمین اوزده هویدا گؤرونور،
بو عجب دیر کی، گون اوزره شب یلدا گؤرونور.
ای سپهر شرف اوزره مه تابانیم اوغول،
ظلمت هجریوه قویدون منی جانانیم اوغول،
ای خطی خیضر، لبی چشمۀ حیوانیم اوغول،
لب لعلینده سنین نطق مسیحا گؤرونور.
ای اوغول، قالدی قارا گونلره بیچاره عروس،
گولو الدن گئدیبن، یالواراجاق خاره عروس،
آل دواغین گؤتوروب، باشه سالیب قاره عروس،
بولبولون سولسا گولو، باشینا سئودا گؤرونور.
کاکیلین حبل متینیمدی، اوزون آیۀ نور،
قاف مسطور جبینیمدی، کتابی مسطور.
شعشعات رخ پاکین ائله‌ییب دهره ظهور،
کربلا تورا دؤنوب، نور تجّلی گؤرونور.
اوخشاییرسان، ای اوغول، گرچی مه انوره سن،
آل اله تیغ هلالین، اور اؤزون لشکره سن،
چون گرک جانینی قربان وئره سن اکبره سن،
اکبرین قتلینه بو قوم مهیا گؤرونور.
سنه قربان اولوم، ای نوگول گولزار حسن،
سنی قربان وئریرم شوقله اول سروره من.
لیلی اؤز اکبری نین گرده نینه سالدی کفن،
چشمینه ایندی نه دنیا و نه عقبا گؤرونور.
جدیمه وئردی خبر حق، زکریا خبریم،
تشت ایچینده کسیلن باشی او یحیی خبرین.
بیل بو آیاتی، اوغول، رمز ایله ایماء خبرین،
ظاهری تشنه حسین، باطنی یحهیی گؤرونور.
«کافیها»-دا وار، اوغول، بیر نئچه مخفی معنا،
«کافی دیر کربوبلا»، «ها»-یی هلاک شهدا،
«یا» یقین عشقدی بو تشنه لب کربوبلا،
«صات»-ی صبر اولماسا، ای تشنه، نه معنا گؤرونور؟
سیّدا، رشته یه چکدین یئنه یوز دُرّ عدن،
سنه محشرده شفاعت ائله سین ابن حسن.
مرحبالار سنه، ای شاعر اعجازسخن،
سنده فیض نظر حضرت مولا گؤرونور.