خوف ائیله‌مه، محشر گونو آخیردا پناهین

بیر چاره قیل، ای عمه، من اؤلسم کفن اولماز،
تابوت و حنوتوم گؤتوروب دفن ائدن اولماز.

قسالیمه من اؤلسم اگر کیم خبر ائیلر؟
قرآن کیم اوخور، قبریمین اوسته گذر ائیلر؟
آخر کی، یتمم، منه بو، چوخ اثر ائیلر،
قارداشیم اؤلوب، باشیمین اوستون کسن اولماز.

بو شامدا هئچ من کیمی بیر آج یاتان وار؟
خاک اوسته قارانلیقدا قورو یئرده قالان وار؟
سن شومره دئ آچسین قولومو، منده نه جان وار؟
هر نوع اسیر اولسا، قولوندا رسن اولماز.

بوندان سونرا هر قدر کی، دنیاده یم، عمه،
هجرین اودونا یانماغا آماده یم، عمه،
هرچند یتمم، یئنه شاه زاده یم، عمه،
شاه زاده بالاسینا خرابه وطن اولماز.

بو شمر قویاندا منی قارداشیما حسرت،
رؤیادا دخی اولمامیشام لحظه ای راحت.
کول باشیما اولسون، منه دنیاده نه لذت،
قارداش دئین وقتده بیر جان دئین اولماز.

ظلم ایله ائدن واختدا بیزی مجلسه عازیم،
باغلاندی قولوم، اولمادی بیر اکبره ناظیم.
زنجیر من بی کسه، قارداش نه لازیم؟
هجرینده منیمتک بئله ذیلت چکن اولماز.

گؤردو بو گؤزوم اکبری بی حاییل و پرده،
کسدیله باشین، سالدیلا جسمین قورو یئرده.
جلاد سویان واختدا دئییردی کی، بشرده
من گؤرمه‌میشم، بیر بئله سیمین بدن اولماز.

گؤردوم کی، نه نوع ایله یزید سقی ملعون،
ائتدی بابامین لل لبین چوب ایله پرخون.
دؤندردی، منیم گؤز یاشیمی ائیله‌دی جیحون،
اوردوقجا دئییردی بئله شکّرشیکن اولماز.

چون گؤردو موحاسینی اولوب قانینا غلطان،
اؤز جاه جلالینی قیلیب خالقا نمایان،
طعن ایله دئییردی کی، اویان، شاه شهیدان،
بو رنگده بیللاه، عقیق یمن اولماز.

هرچند داشیب، سیّد بیچاره، گناهین،
تأثیر ائله‌ییب جمله هامی خلق اوچون آهین،
خوف ائیله‌مه، محشر گونو آخیردا پناهین
بیر کیمسنه غیر از شه گولگونکفن اولماز.