“ضیا” غزئتینه، ایروانلی عباس آقا حاقیندا

“ضیا” غزئتینه

ایروانلی عباس آقا حاقیندا

مرحبا، ای ایروانین خاک زیبا منظری –
کیم، گلیب سندن وجوده اهل معنا سروری.
مرحبا، ای ایروان، ای مجموع البحرین عصر،
بحرسن، عباس ناماور او بحرین گوهری.
گوهر قابل، مُنّ اهل عرفان، فیض حق –
کیم، اولوبدور ذاتی بیر عالی جنابین یاوری.
ائیله‌ییب همت “ضیا” حاقیندا اول خورشیدفر،
تا “ضیا” اولسون جاهاندا اهل حقین رهبری.
عالمه آچسین زبان پند، تؤکسون دُرّلر،
زهره و خورشید و مه اولسون او دوره مشتری.
مرحبا، ای صاحب همت محمدزاده کیم،
سن بو امداد ایله شاد ائتدین دل پیغمبری.
چون غزئتدن شاد اولور اهل سواد روزگار،
سن اونو احیا ائدیب، شاد ائیله دین عالم لری.
سن تکی بیر بئش نفر غیرت کش اولسایدی اگر،
چکمز ایدیک عالم ایچره منت گاو خری.
گر غزئت قدرین هله بیلمزسه بو قوم، عیبی یوخ،
ابتداده هر ایشی، آری، سانیرلار سرسری.
ابتدا موسی نی تکذیب ائتدی قوم قبطیان،
بیلدی لر گوساله نی معبود قوم سامری.
عاقبت اؤز نورینی اظهار قیلدی لم یزل،
اولدولار اول ذات لر هر عیب و نقصاندان بری.
بیلمه سه نادان غزئت قدرین، عزیزیم، نقصی یوخ،
“قدری زر زرگر شناسد، قدری جوهر جوهری”*.
اهل عرفانه ندیم اولماق کمال ایستر اؤزو،
بی کمالین یوخ کمال اهلیله میل خاطری.
نکتۀ “من لم یرک لم یریفه”† اول غوطه ور،
تا سنه اول نکته آچسین بیر متول دفتری.
سن غزئت ترجیحینه عالم لری تحریس ائدیب،
عالمی توتدون عزیز، عالمده خوار ائتدین زری.
پول عزیز اولموش جاهان اهلینه اول غایتده کیم،
تا سانیللار اسکناسی جبرئیلین شهپری.
پولدورور معبودو بو خلقین، نه لازیم مرفعت،
سیمی “یا ستار!” اوخورلار، ذره دئرلر تنگری
سیّدا، عباسه قیل دایم دعا کیم، اول جاوان
حضرت عباس ایله محشور گؤرسون محشری.
دوشمان عباس اولا دایم ابوسن غمتریر،
گؤرمه سین احبابی عقباده سرار آذری.
————————————————
* زر قادرینی زرگر بیلر، گوهر قدرینی صراف.
† سنی گؤرمه ین تانیماز (حدیث)