منو
حاجی گول علی یه
حاجی گول علی یه
ای اولان آل علی چاکری حاجی گول علی،
کمک اولسون سنه هر امرده رب الارباب.
تا کی بو وقته کیمی شهر شماخیده، حاجی،
ائیلییردیم اؤزومو من سنه بیر دوست حساب.
مکه دن گلمیش ایدین، گلمیش ایدیم گؤرمه گوه،
یا کی بیر عذر اولوب، ائیله‌میشم عذره شتاب.
اما ایندی گؤرونور سنده اؤگئ دوغمالیق،
یعنی وار پوللو ایله پول سوزا بیر حد نساب.
گؤزومون نورونا بیر هفته‌دی کی، توی اولاجاق،
حق مبارک ائله سین بو تویو، ای عالی جناب!
تؤکمه سین سینه نه الله او جاوانین داغین،
ائیله سین شاد اونونلا سنی دایم وهّاب!
لیک عرضیم بودو بیر هفته‌دی کی، سفره آچیب،
ائیله دین چای و پلودان هامی خلقی سیراب.
قالمادی شهرده بیر کیمسنه مندن غیری،
هامی دعوت اولونوب پیر و جاوان، شیخ، شباب.
نه اولایدی، بیزی ده دعوت ائدیدین، حاجی،
تا گؤرایدیک اوزوموز کار مبارکده کباب.
ائرمنی، روس، مسلمان هامی مهمانین اولوب،
ائیله ییدین منی ده ائرمنی، یا روس حساب.
حسرتیم قالدی او مجلیسده کی، خوشخوانلاری
اوخویوردو گئجه‌لر شورایله بیداد رهاب.
ایکی مهدی، ایکی خوش لهجۀ فارس ابن نوا،
سؤزلریندن تؤکولوب مجلسه یوز دُرّ خوشاب.
من توتاق کیم، دئییل ایدیم او بساطه لایق،
الده واردیر کی، بهانه، چالینیر چنگ و رباب.
مجلس عشرته شایسته جاوان اوغلوم وار،
من اگر پیر ضعیفم، ولی وار اوندا شباب.
نه اونو ائیله میسن مجلیسه دعوت، نه منی،
کسیب انصافوو الله، ندیر بونجا ایجاب؟
بیر مثل دیر کی، اومان یئردن اولور کوسمکلیک،
کوسموشم سندن، ایا، حاجی فرخنده نقاب!
بیلمه سن گر، مشدی نقدی عمی دن خبر آل،
عقربایم سنه آخر کی، من، ای خانه خراب!
مختصر، باشین اوچون خیلی دییب دیر بو منه،
دوست دشمن لر ایچینده خجیلم، باغری کباب!
سوروشوللار کی، نئچون حاجی سنی رد ائله‌ییب،
قالیرام، لال اولورام، تاپماییرام هیچ بیر جاواب.
بلکه شاعر ایچه بیر چای، گئدر احسانه،
بلکه سیّد یئیجی بیر آش، گؤزه لیم، یوخدو ثواب؟
سیّدا، چوخ دا شکایت ائلمه، ایله تامام!
چونکی میخانه یه مین بعد دئییلسن اسباب.
خلق دیوانه دئییل کی، سانی دعوت ائله سین،
نیه لازیمسان، ایا شاعر شوم و کذاب!
ایستییرسن کی، اگر هر یئره دعوت اولاسان،
باشلا میخانه نی، چال دونبیی، نوش ائیله شراب.
ندیر آخر سنه بو علم و ادب دن حاصل،
آچ گؤزون، وادیی غفلتده داخی ائیله‌مه خواب.
فکروو جمع ائله کیم، جمع ائده سن دولت و مال،
تا سنه خلق ائله سین حاجی و شهزاد و خطاب.
چونکی دولتله گئدر گرد فغارت سندن،
تاپیلیر اوندا سنه بیر نئچه زیبا القاب.
اوندا حاجی گول علی چایمی ایچمز سنسیز،
خیر و شرع ده سنیده دعوت ائدر چون اصحاب.
نه یامان درد ایمیش عالمده فقیرلیک، یارب!
فقرلیک دن خوش اولور نار جهنمده عذاب.
سیّدا، حاجی سنی سهو ایله یاددان چیخاریب،
کؤنلوو، قورخما، آلیر لطف ایله اول عرش جناب.
بار ایلاها، بو تویو ائیله مبارک کی، منیم
نور چشمیمدو او دوردانۀ بحر انساب.