حاجی مجید افندیه

حاجی مجید افندیه

لطف حق چون کایناته خلعت خلقت وئرر،
هر کسین اؤز قدرینه منسوب بیر خولت وئرر.
هر کسین اؤز آرزوسونجا لایقینی وئردی حق،
حکمتی وار کیم، کیمه فقر و کیمه دولت وئرر.
مبدأ فیاضده یوخ بیخل، ای صاحب خرد!
قابلیت قدری هر بیر چیزه بیر صورت وئرر.
گرم اولور، ائیلر غذا چونکی عفونت معده دا،
قویۀ تولید اونا هر لحظه بیر حالت وئرر.
اول حکیم لایزالین حکمتیندن یوخ سئوال،
هر کسه هر نه وئریب دیر موجب حکمت وئرر.
مقتضای ذاتیدیر هر بیر کسین اؤز خلقتی،
خاکه سفلی لیک عطا، افلاکه گر رفعت وئرر.
مختلف دیر چونکی اسماسی حکیم مطلقین،
اختلافات ایله بئش اشیایه خاصیت وئرر.
ایکی سین اوکسینده علت یوخدو، ای ارباب هوش،
مختلف آیینه لردیر، مختلف صورت وئرر.
اولدی استعدادلار چون مختلف اسما ایله،
شئی واحد بس بو اوزدن صورت کثرت وئرر.
منبسط دیر کلّ اشیاء ده ظهور ذات حق،
بیر تجّلا دیر کیم، اول موسی اونا طاقت وئرر.
ذات حقی سانما اشیاده حلول اختلاط،
کیم حلوله معتقددیر عقلینه خفت وئرر.
بیل کی، موجود مجازی دیر جمیع ممکنات
کیم، تجّلا مظهریت له اونا شهرت وئرر.
اول تجّلا گر تعلق قطع ائده امکاندن،
نیست و نابود اولماغی امکان اوچون سرعت وئرر.
“داخلون فی کلی شئیین، خارجون ان کلی شئی”*،
قول مولای جاهان اعلانی بی شبهت وئرر.
هم ازلده، هم ابدده ماسوا معدوم دور،
مظهریت شرط اولوب، اعیانه ماهیت وئرر.
اولما سوفیستان تک منکر وجودین حقینه،
حق وجودی ممکناته زیور و زینت وئرر.
ممکنات عالم اؤز ذاتیله قایم اولماییب،
قایم بالغیره دیر، حق فیض هر ساعت وئرر.
جوهر ناریده یوخدور صورت رحمانیات،
خاکه بس اوز صورتین یزدان بی صورت وئرر.
ائتمه‌دی بو جهل ابوجهلی خداوند جاهان،
قالیبین ترکیب ائدیب اجزاسینا الفت وئرر.
نقطۀ کفره مقابل نقطۀ ایمان دورار،
هر شئیین ضدی اونون تشحورینه قوت وئرر.
نور و ظلمت، کفر و ایمان، حب و بغض و خوب و زشت،
ائتدیگی اوزدن تقابل ذاتما بهجت وئرر.
مؤمن ایله کافیرین باری خدا دیر خالقی،
فیض خلقت هر شئیه سلطان بی منت وئرر.
لیک اولماز کافیرین کوفنینه راضی لطف حق،
علت موجوده نین دفعینه یوز آلت وئرر.
انفوسو آفاقده آیات لر ایجاد ائدر.
شبهه دن ائیلر موعرا فیض هر نوبت وئرر.
زنگ کفری خاطر فرعوندن پاک ائتمه یه،
صیقل راخشنده موسی یه ید قدرت وئرر.
کافیرین کفرونه گر راضی اولا باری خدا،
انبیایه بس نه دن تبلیغ ایله زحمت وئرر؟
کفرایله ایرانه صورت وئردی خلاق و خدا،
ماهه سردیت وئرن، خورشیده گرمیت وئرر.
عینی عدلین دندی گور ائیلر عقوبت بیر کسه،
فیض فضلیندندی گر غیره رفاهیت وئرر.
حقه طاعتدن تفاخور ائیله‌مه، ای بولهوس،
شوکر اونا قیل کیم، سنه حق قویۀ طاعت وئرر.
فعل شرین نسبتین قیل نفسووه، ای زول لوباب،
گرچی خیر و شرّه صورت اول شه وحدت وئرر.
اولما شیطان کیم، ائدیب عصیان دئدی: “اغوی تونی”،
بی ادب اؤز فعلی نی خلاقینا نسبت وئرر.
آدم اول، “انا زلمنا” نوحه سیله ناله قیل
کیم، عنایت لر سنه اول صاحب رحمت وئرر.
کفر مغزیدیر بو حالت لر، نه تقدیر خدا،
ای کؤنول، سؤز مشکل اولدو سامعه سیقلت وئرر.
قیل اطاعت سن ابوالقاسم محمد شرعینه
کیم، تشکر نعمت اوزنیایه هم نعمت وئرر.
هر نه چاتمیش شرع پاک مصطفی دن، قیل قبول،
مسلم و ارمینه تابع لیک سلاحیت وئرر.
ائیله دایم چاریار مصطفی نون مدحینی،
خاصه قیل صدیق مدحین کیم، دله راحت وئرر.
مایۀ غار مصطفی دور، زینت رکن صفا –
کیم، صفالر عالمه اول کعبۀ شوکت وئرر.
جمله دن ائتمیش دیر اول نقل معراجی قبول –
کیم، بو تسلیقی اونون عالم لره لذت وئرر.
ائیله اوندان سورا اول فاروق اعظم وصفینی
کیم، اونا فتح و ظفرلر صاحب نصرت وئرر.
بیدق اسلامی گردینه اوجالتمیش کن او شاه،
بیر پیاله رخ دوتوب احوالینه ذلت وئرر.
زخم خنجرله ابول اولنی اونو قیلدی شهید،
گوهر اشکه عزاسیندان نبی قیمت وئرر.
دوغمویوب گون بیر کسی افضل اولا فاروق دن،
فرق حق دن باطله اول صاحب رفعت وئرر.
ای کؤنول، قیل خاصه ظل نورین پاکون مدحینی
کیم، اونون نور روخی خورشیده یوز خجلت وئرر.
امّ گولسومو روقیه دوختران مصطفی،
زوجه سیدیر اول شهین، حق تورفه زوجیت وئرر.
قیلدی مفسدلر اونی محراب طاعتده شهید،
خون پاکی آیۀ قرآن آرا زینت وئرر.
خوف ائدیب تحریف دن جمع ائتدی قرآن حقی،
حق اونا قرآن اوخوندوقجه حق و اوجرت وئرر.
بعد عثمان ائت شه دولدول سوانین وصلینی،
روح قدسی ائتمگه مدحین سنه جرعت وئرر.
سانما کیم، اول شاهی آنجاق مدح ائدوبدور هلته،
لاوکللا یوز خبر قرآندا هر آیت وئرر.
فاتح خیبر، قوزونفر بیر امیر لافتا،
سطوطیندن جانینی هر صاحب سطوط وئرر.
جن و انسون طاعتیندن اولدی افضل ضربتی،
یا علی، الله علی، آری، بئله ضربت وئرر.
ائیله آندان سورا بیر بانوی عصمت وصفینی،
عصمتی هر خاندان عصمته عفت وئرر.
زؤهره اؤز هر اوج بیر کوکب، احد عشر،
کایئی تتهیر اونون شأنینده عامیت وئرر.
یا رسول لله، ترحم قیل غلامون سیّده،
قویما کیم، شیطان اونا هر لحظه یوز خلعت وئرر.
ساخلا ایمانون اونون شیطان بد فرجامدین
اول زمان کیم، اخذ ایمان ائتمه گه شربت وئرر.
گؤرسه شعرین، سیّدا، حاجی مجید زول لوباب،
هیچ شک یوخدور سنه تحسین ائدور، خلعت وئرر.
ائت دیاللویه سفر، دوری یئتیر صرافیما،
رسم دیر، صراف اولان کس گوهره قیمت وئرر.
کبه دیربیت همایونی او حبیب رفعتین،
کعبه، آری، صاحب دعوت ایله حاجت وئرر.
بسدیر اول کی، مفتی آغادان ائشیتدین وصفینی،
ذات پاکی گون تکی اؤز نورینه شهرت وئرر.
بار ایلاها، شادکام اولسون بو صاحب مرفعت،
تا کی فیضین عالمه خورشید هر ساعت وئرر!
———————————————-
*هر شئیه داخل دیر، هر شئی دن خارج دیر