منو
سیّد، بیر اؤزگه رمز گؤروندو بو نظمدن
ای دادمایان زمانه آرا عشق شربتین،
بس آغزی نین هاچان بیلیسن سؤیله لذتین؟
گئت راحت اول، سنینله بیزیم یوخدو کاریمیز،
قوی بیز چکک بو بادییه نین بار محنتین.
بیز خازن امانت عشقیک کی، کردگار،
صندوق سینه میزده قویوبدور امانتین.
عشق اولماسایدی، اولماز ایدی حسن مشتحیر،
حسن اولماسایدی، عشق ایتیرمیشدی شهرتین.
عرض ائتدی حسن عالمه معشوقۀ ازل،
عشق ائیله‌دی قبول اونون دورد و زحمتین.
عشق ایدی کیم، خلیلینی حفظ ائتدی ناردن،
سؤندوردو بیر خطاب ایله نارین حرارتین.
مجنونو حسن لعلی ایدی دربدر قیلان،
عشق ایدی آرتیران بولارین بونجا رطباتین.
عیسی نی چرخ چارومه قالخیزدی عشق حق
کیم، واصل ائتدی خانۀ خورشیده رفعتین.
شیرین نین عشقی ائیله‌دی فرهادی تلخکام،
عذرا هواسی وامقین آرتیردی خفتین.
حسن ایدی یوسفی ائله ین شهرۀ جاهان،
عشق ایدی آرتیران او زلیخا محبتین.
حسن ایله عشق اولماسا، حاصل نه دهردن،
بی عشق کیمسه آنلاماییب سرّ خلقتین.
صوت ایله حسن نور علی نوردور گؤزوم،
مندن سروش بو تحفه‌لرین قدر و قیمتین.
داود حسن صوتینی “تالوت”دن سوروش،
“جالوت” آنلاماز بو ایشین سرّ و حکمتین.
لحن هودیله شوره گلیر ناقۀ عرب،
ای شیخ کج منش، اوخو باری روایتین،
ای شیخ، سانما عشق مجازی بو عشقی سون،
بو نکته نین مجازده گؤردوم حقیقتین.
هر یئرده دیر خدای عهد نور و جلوه گر،
وحدت گؤزیله باخ، بیله سن سرّ وحدتین.
غیر از وجود حق یوخ ایمیش جلوه گؤسترن،
گؤردوم من، عینی وحدت ایمیش جمله کثرتین.
عالمده اولسا ایدی خدابین اولان گؤزون،
هر شئیده سن گؤرردین آیاتی حق صورتین.
اول گون کی، گؤردو یاریمی آدم، بهشتدن
دوشدو هوای وصلینه، ترک ائتدی جنّتین.
آخردا اولدو متکف باب دولتی،
دار السلامه واصل اولوب تاپدی بهجتین.
سئیر ائت نجف دیارینی، قاپ دُرّ وحدتی،
بوندان زیاده من نه آچیرا یار صحبتین؟
انسانی خلق ائیله‌دی اؤز صورتینده حق،
باخ عارض نگاریما، گل گؤر علامتین.
واریمدی مصر قلبده بیر یوسف عزیز،
حق دولدوروبدو کؤنلومه مهر و موّدتین.
اول یوسف عشقی ائیله‌دی وادار کیم، منی
تحریر ائدیم بو نوع ایله یوسف حکایتین
گه قاضۀ کلام قیلار حسن یوسفی،
گه فاش ائدر او ماهه زلیخا ارادتین.
شاید کی، رمزدن اولان آگاه حالیما،
اظهار ائده بو عاشیق زاره عنایتین.
ای دل، بو حاله گتدی سنی بادۀ ولا،
انکار قیلما پیر مغانین کرامتین.
سیّد، بیر اؤزگه رمز گؤروندو بو نظمدن.
حال اهلی نین بو رمز فزون ائتدی حالتین.