منو
سیّدین مناجاتی
سیّدین مناجاتی
جاهان جهنده دون، ای دوست لار، کنایت دیر،
تصور ائیله‌مه کیم، جای استراحت دیر،
عبث جاهان اونا آد قویمادیلار، ای عارف،
جاهان چو برق جهنده مقام سرعت دیر.
یوز ایل گر عمر ائده سن، جان یئتن زاماندا سونا،
بئله تصور اولور، دوغدوغون بو ساعت دیر.
اگر مین ایل ائده سن عمر سن ده نوح کیمی،
سفینۀ عملین غرق بحر رحلت دیر.
جاهان نه خیضرا وفا ائیله یر، نه ایلیاسه،
بو بیوفایه امید ائیله مک صفاحت دیر.
قیامتین قوپار اول گون کی، رحلت ائیلرسن،
جاهاندا هر نفسین بلکه بیر قیامت دیر.
خوش اول کی، خطۀ اجسامه باسماییبدی قدم،
مقام روحده بلغیب جسم راحت دیر.
نه گلمه‌ییبدی جاهانه، نه چکمه‌ییب محنت،
دیار پاک عدمده یاتیب، فراقت دیر.
نه یاره عاشیق اولوب، نه چکیر غم هجران،
نه کان آه و فغان دیر، ایشی نه محنت دیر.
تصور ائیله‌مه کیم، دولت ایله راحت اولور،
کیمین کی دولتی چوخدور، قرین زحمت دیر.
پل مجازی دو دنیا، اگر اونو کئچه سن،
کؤنول، او سمته یولون کشور حقیقت دیر.
زمانه مزرعه دیر، اوندا اک عمل تخمین،
او تخم بانسیدی؟ بیل: طاعت و عبادت دیر.
اوزو قارا، الی بوش، چاکریندی سیّد زار،
امیدی سندن اونون لطف دور، عنایت دیر.
اگر بهشته آپارسان، تفضلوندن دیر،
اگر جهنمه سالسان، یئنه عدالت دیر.
بو قدر جورم ایله سندن دئییل کؤنول نومید،
بیلیبدی درگه مولانی باب رحمت دیر.
جزا گونونده بیزیم کیمی روسیاه لره،
محمد عربی صاحب شفاعت دیر